A Asociación Cultural Alexandre Bóveda informa que o vindeiro luns 24 de maio, terá lugar a presentación do libro Lingua de calidade.  Vinte reflexións e unha proposta esperanzada para un galego con futuro e posterior charla de  Xosé Ramón Freixeiro Mato.

Lingua de calidade, editado por Edicións Xerais de Galicia, pretende dar algunhas receitas para determos o proceso de deturpación castelanizadora da nosa lingua e para (re)construírmos un galego de calidade liberado de interferencias espurias, un galego máis auténtico e por iso con futuro. Aínda que boa parte desas receitas son de natureza lingüístico-gramatical (fonéticas, morfolóxicas, sintácticas, léxicas ou pragmáticas), tamén se inclúen algunhas reflexións que pretenden contribuír para o fortalecemento da nosa autoestima lingüística, tentando desfacer de paso algunhas ideas preconceptuosas sobre a súa historia e situación actual. Un galego de calidade utilizado oralmente e por escrito por persoas orgullosas e conscientes da importancia do seu idioma é a fórmula máis acaída para garantirmos o seu futuro.

Será ás 20:30 h, no salón de actos da asociación, con entrada libre. 

A Asociación Cultural Alexandre Bóveda informa que o vindeiro mércores 12 de maio e con motivo da celebración do Día das Letras Galegas, terá lugar a conferencia Regreso a 'Os eidos' de Manuel Castelao sobre Uxío Novoneyra.

 Será ás 20:30 h, no salón de actos da asociación, con entrada libre. 

Manuel Castelao, investigador incansable e estudoso da lingua, ven de publicar o libro Novoneyra/Celso Emilio, un traballo editado por Laiovento que se une ás celebracións do Día das Letras.No libro Castelao realiza un percorrido pola obra senlleira do autor do Courel, Os eidos, a tentar facer accesíbel a enorme riqueza dese universo poético. Completa o volume un ensaio sobre a Longa noite de pedra, de Celso Emilio Ferreiro, caracterizado pola vontade de facer accesíbel a experiencia literaria, tarefa esta máis premente cando, opina o autor, "na actual sociedade da vídeoconsola, os clásicos poderían parecer inactuais".

 A Asociación Cultural Alexandre Bóveda informa que os vindeiros luns 10 e martes 11 de maio, e con motivo da celebración do Día das Letras Galegas terá lugar un curso intensivo de perfeccionamento de galego, intitulado Por un modelo digno de lingua. 

Será de 20:00 h. a 22:00 h., no salón de actos da asociación, a cargo do profesor da Universidade da Coruña, D. Xosé M. Sánchez Rei. 

O curso é totalmente gratuíto.

A Asociación Cultural Alexandre Bóveda informa que o vindeiro martes 27 de abril,

 terá lugar a presentación do libro Do corpo e a súa ausecia de Medos Romero.

A autora estará acompañada por Xulio López Valcarcel e Dores Sánchez Alegre. 

Será ás 20:30 h. no salón de actos da asociación.